ما هي Cydia‬ و ‏Jailbreak

قبل ما نبدأ ننشر أهم و أحدث ادوات السيديا .. من المنطق اننا نوضح للناس ايه هي السيديا و ايه هو الجيلبريك بالنسبة لمستخدمي نظام الiOS سواء كان ايفون ايباد ايبود ........

باختصار و تبسيط للمعلومة .. سيستم الايفون مغلق .. بمعنى اصح متقدرش تعدل ع الجهاز يعني اخرك تفتح الاب استور المتجر الوحيد الموجود ع الهاتف تنزل التطبيق .. وبعد ما تنزله مهمة التطبيق في انك تفتحه تستخدمه و تخرج منه ..
مفيش تكامل بين التطبيقات زي الاندرويد .. يعني الدنيا مش سايحة على بعضها زي الاندرويد . انك تنزل تطبيق يتكامل مع تطبيق تاني ..لاه كل تطبيق شغال في sandbox خاص بيه .و التطبيقات دي متقدرش تعدل في النظام يعني لا تغير ثيم و لا تعدل في ايقونات او تضيف حاجه ناقصه في السيستم از تغير مثلا لوك سكرين او لانشرات زي الاندرويد..
والكلام ده كان موجود قبل ios8 بس بدأت الانفتاحية شوية بعد iOS8 بس بطريقة ابل ,, يعني تقدر دلوقتي تضيف كيبورد زي الاندرويد بسهولة
الحاجه التانية ابل بتجبرك بانك متحملش اي تطبيق غير من متجر البرامج الخاص بيها عكس الاندرويد اللي ممكن تضيف و تسطب متاجر خارجية
بل مش كدا و بس ابل مش بتسمحلك اساسا انه فيه تطبيق ينزل من بره ابل ستور . يعني حتى لو سحبت التطبيق و جيت تسطبه مش هينفع يتسطب ..
النقل بالبلوتوث مش متفعل في اجهزة الايفون فيه بلوتوث اه بس متقدرش تنقل بيه ملفات
مفيش مدير ملفات تتصفح بيه ملفات النظام
كل دي وغيرها قيود ابل بتفرضها عليك ..
طب ايه الحل ؟؟؟؟؟ الحل انك تكسر القيود دي .. و منها جات كلمة جيلبريك يعني كسر السجن . كسر سجن الايفون اللي ابل عاملاه و بتجبر المستخدمين على حاجات معينة او بتحطلهم حدود معينة
الناس بتعمل جيلبريك عشان خاطر يتحكم في كل مللي في الجهاز بتاعه بينقل الجهاز بتاعه لنقلة تانية خالص .. ساعتها يقدر يضيف ثيمات يعدل في كل حتة في الجهاز يضيف ادوات في مركز التحكم او في مركز الاشعارات يفعل البلوتوث و ينقل لاي اجهزة تانية يعدل في شاشة القفل الحركة بين التطبيقات يضيف خصائص للنظام و يضيف خصائص لسفاري مثلا انه تقدر تعمل بيه دوان لود او تنزل برامج متكركة .
يعني البرامج اللي على متجر ابل بفلوس ممكن تنزلها من متاجر خارجية او تحملها من ع النت زي الاندرويد و تشتغل معاك بدل ما ابل بتجبرك على استخدام متجرها
و يضيف النواقص اللي كانت موجودة في النظام و غيره من الاف الادوات الموجودة في السيديا !
سيديا ؟!! ايه السيديا دي بقى !!!
باختصار بعد ما بتعمل جيلبريك . بتقدر تعدل في النظام . بدل ما تعدل بشكل يدوي في الاكواد بنفسك انت ممكن تنزل ادوات عن طريقها بتعمل اوامر تعدل في النظام .. طيب الادوات دي هتبقى فين ؟ اكيد لازم يكون في مكان نجيبها منه .. ايوه المكان ده هو متجر السيديا . بعد ما بتعمل جيلبريك بينزل معاه السيديا .. يبقى هو عباره عن متجر تنزل منه الاف الادوات اللي تعدل في النظام .!
طيب السيديا عباره عن متجر بيستمد ادواته منين ؟؟
بيجيبها من المطورين اللي بينزلوا ادواتهم على سورسات !
ايه سورسات دي ؟
دي سيرفرات بتضيف عليها الادوات فيه سيرفرات ع السيديا جاهزة ممكن ترفع عليها كمطور ادواتك او تعمل انت سورس خاص بيك و الناس تضيفه ع السيديا بتاعتهم و ينزلوا الادوات اللي انت منزلها عليه ..
سورسات عباره عن روابط بتضيفها في السيديا تضيفلك الادوات
و مش كدا بس ده لو فيه اداه ع السيديا بفلوس ممكن تنزلها من سورس تاني يكون مهكرها و منزلها ببلاش
طيب طريقة اضافة السورس للسيديا ؟
ممكن تشوفها من الرابط التالي ...
https://www.youtube.com/watch?v=79n4OBWtNh0
طيب ايه اشهر سورسات ممكن اضيفها بجانب السورسات الجاهزة الموجودة ع السيديا ؟
السورسات الموجودة ع السيديا بيكون فيها كل حاجه و فيه منها الاداوت المجانية و فيها منها اللي بفلوس .. تقدر تنزل اللي بفلوس ببلاش من سورسات تانية تضيفها .. ممكن تبحث عن اشهر السورسات على جوجل
طيب انا عجبني الحوار ده عاوز اعمله بقى .....
كل اصدار من الاي او اس الخاص بالجهاز .. ليه طريقة معينة لتنزيل السيديا .. يعني بتختلف من اصدار للتاني و كل اصدار وليه طريقة ..
حقيقي السيديا عالم تاني بتفتحه لجهازك الايفون و الايباد
ودي مقدمة بسيطة عشان هنبدأ نرفع اداوت السيديا ... و نبين للناس بعض المتاجر الخارجية اللي ممكن يحملوا منها تطبيقات بدل اب ستور